Datorren apirilaren 17an, Ostegun Santu egunez, Txugi Txapelketaren 28. edizioa jokatuko da Argixaon. Urola Kirol Elkarteak Iñaki Mendiluce Txugi-ren omenez antolatzen duen torneoan hamasei taldek hartuko dute parte: emakumezkoen infantil mailako zortzik, eta gizonezkoen kimu mailako beste zortzik.
Emakumezkoen torneoan 2011 eta 2012 urteetan jaiotako neskak lehiatuko dira: D multzoan Urola, Reala, Ilintxa eta Aloña Mendi daude; eta E multzoan Intxurre, Aiztondo, Goierri Gorri eta DUX Logroño.
Gizonezkoen txapelketan kimu mailakoek jokatuko dute, 2013an jaiotakoek: A multzoan Urola, Reala, Bergara eta Ilintxa daude; eta B multzoan, Arnedo, Idiazabal, Aloña Mendi eta Tolosa.
Partidak beheko eta goiko zelaietan (Argixaon eta Luis Urdangarin-en) jokatuko dira, eta guztiek 20 minutuko iraupena izango dute.
Txapelketaren lehen fasea 09:00etan hasiko dute mutilek eta 9:30ean neskek. 12:00etan Iñaki Mendiluceri omenaldia egingo dio klubak, haren familiarekin batera; eta 12:15etan abiatuko da bigarren fasea. Kopako finalak 13:45ean jokatuko dira, eta Txapeldunen Ligakoak 14:15etan.
Ohi bezala, bitan zatituko baita Txugi Txapelketa, bigarren fasean. Lehen fasean, multzo bakoitzeko taldeek hiruna partida jokatuko dituzte. Multzo bakoitzeko 3. eta 4. sailkatuek elkarren aurka jokatuko dute, eta irabazleak Kopako finalean lehiatuko dira. Multzo bakoitzeko 1. eta 2. sailkatuak, berriz, Txapeldunen Ligako finalerdietara pasako dira, eta bi irabazleak finalera. Iaz, Osasuna emakumezkoetan eta Martutene gizonezkoetan izan ziren Txapeldunen Ligako irabazleak.
Iñaki Mendiluceren itzala
“Osabak balore bezala zituen talde-lana, konpromisoa, elkartasuna, bai futbolean, baita handik kanpo ere”, adierazi du haren iloba eta Zumarragako Udaleko zinegotzi Iñaki Mendilucek, txapelketaren aurkezpen prentsaurrekoan, eta osabaren izena daraman torneoak balore horiek oinarri dituela ikustea pozgarria dela gaineratu. Ostegunean Argixaon egindako prentsaurrekoan izan dira, halaber, Urolako lehendakari eta lehendakari-orde Felipe Elgarresta eta Karmele Segura; eta Urretxuko Udaleko zinegotzi Maialen Fidalgo, zeinak Txugi Txapelketak urteotan berdintasunerantz eman dituen urratsak nabarmendu dituen, neska eta mutil talde kopuru berak parte hartzea adibide moduan jarrita.
