Emakume zein gizonezkoetan, Reala gailendu da 28. Txugi Txapelketan, finalean Goierri Gorri eta Ilintxari irabazita hurrenez hurren. Kopa, aldiz, Urolak irabazi du gizonezkoetan, eta Dux Logroñok emakumezkoetan.
Apirilaren 17an, Ostegun Santu egunez, jokatu da Txugi Txapelketaren 28. edizioa Argixaon. Urola Kirol Elkarteak Iñaki Mendiluce Txugi-ren omenez antolatzen duen torneoan hamasei taldek hartu dute parte: emakumezkoen infantil mailako zortzik, eta gizonezkoen kimu mailako beste zortzik.
Emakumezkoen torneoan 2011 eta 2012 urteetan jaiotako neskak lehiatu dira, bi multzotan banatuta: Urola, Reala, Ilintxa, Aloña Mendi, Intxurre, Aiztondo, Goierri Gorri eta DUX Logroño. Finalean, Realak 2-0 irabazi dio Goierri Gorriri.
Gizonezkoen txapelketan kimu mailakoek jokatu dute, 2013an jaiotakoek: Urola, Reala, Bergara, Ilintxa, Arnedo, Idiazabal, Aloña Mendi eta Tolosa. Finalean, penaltietan irabazi du Realak, Ilintxaren aurkako partida bana bukatu ostean.
Kopa, Urola eta Dux-entzat
Ohi bezala, bitan zatitu da Txugi Txapelketa. Lehen fasea jokatuta, puntu gehien lortu dutenak Txapeldunen Ligarako sailkatu dira; eta gainerakoak, berriz, Koparako.
Gizonezkoetan Urola gailendu da Kopan, etxeko zaleen gozamenerako, penaltietan Bergarari irabazita. Partida bina amaitu dute.
Emakumezkoetan, bestalde, Dux Logroñok irabazi du, finalean Aiztondo mendean hartuta (4-0).
Giro ederra futbol zelai eta harmailetan
Ikusle ugari bildu du aurten ere Txugi Txapelketak, izan Luis Urdangarin zelaian –han jokatu dira partida asko–, eta bereziki Argixaoko harmaila eta behealdeetan. Giro ederrean jokatu dira partidak, bai jokalarien artean, baita txapelketa ederraz gozatu duten zaleen artean ere.
